Jahon tarixida 12 aprel sanasi inson tomonidan koinotga ilk parvoz amalga oshirilgan — dunyo tamaddunini ifodalovchi kun!
Yuriy Alekseevich Gagarin 1961 yilda «Vostok» kosmik kemasida oʻzining mashhur xitobi —“Poyexali!” (“Ketdik!”) hayojonli soʻzlari bilan ulugʻvor fazoga yoʻl olgan.
Umumiy 108 daqiqa davom etgan bu parvoz koinotni oʻzlashtirishda ulkan qadam boʻldi va ushbu voqea sharafiga har yili butun dunyoda Aviatsiya va kosmonavtika kuni nishonlanadi.
Ushbu kun munosabati bilan Yakkasaroy tumanida joylashgan Kosmonavtlar maydonini taʼmirlash ishlari yakunlandi.
Bu yerdagi granit plitalar almashtirildi, oʻrindiqlar joylashtirilib, chor atrofi turfa gullar bilan bezatildi, daraxtlar ekildi. Tungi yoritish chiroqlari ham zamonaviy yoritgichlarga almashtirildi. Maydon koʻrkam va orombaxsh saylgohga aylandi.
Aholiga kosmonavt Vladimir Janibekov haykali bilan birga “Koinot” monumental sanʼat yodgorligi oʻrnatilgan maydon 12 aprel — Kosmonavtika kuniga munosib sovgʻa boʻldi. Bolalarning quvnoq va jarangdon ovoziga toʻldi. Keksalar dam olib oʻtiradigan saylgohga aylandi.
Otabek Nasimov, Yakkasaroy tuman hokimligi Matbuot xizmati
