Toshkent Davlat sharqshunoslik universitetida Islom Hamkorlik tashkiloti Yoshlar forumining Osiyo mintaqaviy boʻlimi bilan hamkorlikda Sharqning buyuk allomalari Nizomiy Ganjaviyning 880 yilligi va Alisher Navoiyning 580 yilligiga bagʻishlangan xalqaro ilmiy – amaliy konferensiya onlayn va oflayn tarzda boʻlib oʻtdi.
“Nizomiydan Navoiygacha boʻlgan maʼnaviyat koʻpriklari” mavzusidagi xalqaro konferensiyada Toshkent Davlat sharqshunoslik universiteti rektori Gulchehra Rixsiyeva, Ozarbayjon Respublikasining Oʻzbekistondagi Favqulodda va muxtor elchisi Guseyn Guliyev, Islom Hamkorlik tashkiloti Yoshlar forumining Osiyo mintaqaviy boʻlimi raisi Elchin Askerov qisqacha kirish soʻzi bilan qatnashib, ikki xalq doʻstligi, madaniy hamkorlik aloqalari qadimiy qadriyat ekanligi haqida gapirishdi.
Ilmiy –amaliy tadbirda Ozarbayjon Respublikasi Fanlar akademiyasi haqiqiy aʼzosi, Qoʻlyozmalar instituti direktori Temur Karimli, Toshkent Davlat sharqshunoslik universiteti Sharq filologiyasi va tarjimashunoslik fakulteti mumtoz filologiya va adabiy manbashunoslik kafedrasi mudiri R. Alimuhammedov hamda ushbu kafedra prfessorlari, filologiya fanlari doktorlari Qosimjon Sodiqov va Boqijon Toʻxliyev, Oʻzbekiston Respublikasi Madaniyat vazirligi hueuridagi Oʻzbekistonga oid xorijdagi madaniy boyliklarni tadqiq etish markazi yetakchi ilmiy xodimi, filologiya fanlari doktori, prfessor Aftondil Erkinov kabi mutaxassislar ilmiy maʼruzalari bilan ishtirok etishdi.
Shuningdek, ilmiy-amaliy anjumanda universitet talabalari Nizomiy va Navoiy sheʼrlarini ifodali oʻqib, tinglovchilarni xushnud etishdi. Tadbir doirasida Islom madaniyati allomalariga bagʻishlangan va ingliz tilida chop etilgan kitobning taqdimoti ham oʻtkazildi.
Nodira SAʼDULLAYEVA, Toshkent Davlat sharqshunoslik universiteti oʻqituvchisi
