Oʻzbekiston Respublikasi Prezidenti Shavkat Mirziyoyev rasmiy tashrif bilan Qohira shahriga keldi, deya xabar beriladi prezident. uz rasmiy veb- saytida.
Misr poytaxtining xalqaro aeroportida davlatimiz rahbarining tashrifi munosabati bilan ikki mamlakat bayroqlari koʻtarildi, faxriy qorovul saf tortdi.
Oʻzbekiston yetakchisini Misr Arab Respublikasi Prezidenti Abdulfattoh as-Sisi kutib oldi va samimiy qutladi. Davlat rahbarlarining qisqa uchrashuvi boʻlib oʻtdi.
Bugun davlatimiz rahbari Qohirada buyuk alloma bobomiz Ahmad Fargʻoniy tomonidan barpo etilgan “Miqyosi Nil” inshootiga tashrif buyuradi va Misr sivilizatsiyasi milliy muzeyi bilan tanishadi. Ushbu mamlakat yetakchi kompaniyalari va moliyaviy tuzilmalari rahbarlari bilan uchrashuv oʻtkaziladi.
Tashrifning asosiy tadbirlari, shu jumladan oliy darajadagi muzokaralar ertaga, 21 fevral kuniga moʻljallangan.
