Soʻnggi yillarda mamlakatimizda davlat va jamiyatning turli sohalari isloh qilinib, ular doirasida davlat boshqaruvi tizimini takomillashtirish, biznes muhitini yaxshilash, iqtisodiyot tarmoqlarini transformatsiya va modernizatsiya qilish, hududlarni ijtimoiy-iqtisodiy rivojlantirish, shuningdek, tashqi savdo, soliq va moliya siyosatini liberallashtirish boʻyicha aniq choralar koʻrildi.
Shu bilan birga, bugungi kunda jahondagi tez oʻzgaruvchan siyosiy-iqtisodiy vaziyat milliy iqtisodiyotning barqaror rivojlanishini taʼminlash, mahalliy ishlab chiqaruvchilarning tashqi bozorlardagi raqobatbardoshligini oshirish, aholining yashash sharoitlarini yanada yaxshilash va inson kapitalini yuksaltirish boʻyicha yangi yoʻnalishlarda taʼsirchan islohotlarni amalga oshirishni taqozo etmoqda.
2022–2026 yillarga moʻljallangan Yangi Oʻzbekistonning taraqqiyot strategiyasini amalga oshirishni samarali tashkil etish, islohotlarning uzviyligini taʼminlash orqali ularni amalga oshirishda yagona yondashuvlarni shakllantirish va joriy etish maqsadida:
1. Oʻzbekiston Respublikasi Strategik rivojlanish agentligi negizida Oʻzbekiston Respublikasi Prezidenti huzuridagi Strategik islohotlar agentligi (keyingi oʻrinlarda – Agentlik) tashkil etilsin.
2. Quyidagilar Agentlikning asosiy vazifalari etib belgilansin:
mahalliy va xorijiy ekspertlarni jalb etgan holda alohida soha va tarmoqlarni isloh qilish boʻyicha takliflar ishlab chiqish, ularning amalga oshirilishini tashkil etish va nazorat qilish;
soha va tarmoqlarda amalga oshirilayotgan islohotlarni tanqidiy tahlil qilgan holda ularning samaradorligini baholash, rasmiyatchilik, sansalorlik va korrupsiyaviy holatlarga sharoit yaratuvchi tizimli muammolarni aniqlash va ularni bartaraf etish boʻyicha choralar koʻrish;
Yangi Oʻzbekistonning taraqqiyot strategiyasi va davlat dasturlarining ijrosini monitoring qilish asosida ularning toʻlaqonli va sifatli amalga oshirilishini muvofiqlashtirish;
xalqaro moliya institutlari, chet el tashkilotlari va xorijiy mutaxassislarni hamda begʻaraz koʻmak mablagʻlarini jalb qilish ishlarini tizimli tashkil etish, ular boʻyicha axborot
va hisobotlarning maʼlumotlar bazasini yaratish;
davlat ishtirokidagi korxonalarni transformatsiya qilish, jumladan hisobotlarni xalqaro standartlar asosida tuzish, boshqaruv organlari tarkibiga mustaqil aʼzolarni kiritish va sohaga oid boʻlmagan aktivlardan samarali foydalanish boʻyicha amalga oshirilayotgan ishlarning natijadorligini monitoring qilish.
3. Oʻzbekiston Respublikasi Prezidenti raisligida Oʻzbekiston Respublikasi Prezidenti huzuridagi Strategik islohotlar agentligining kengashi (keyingi oʻrinlarda – Kengash) 1-ilovaga muvofiq tarkibda tashkil etilsin.
Belgilab qoʻyilsinki:
Kengash Agentlik faoliyatining ustuvor yoʻnalishlarini, samaradorligining asosiy koʻrsatkichlarini, uning faoliyati bilan bogʻliq boshqa qarorlarni, shuningdek, Agentlik tomonidan oʻz oldiga qoʻyilgan vazifalarni amalga oshirish boʻyicha ishlab chiqilgan takliflar, “yoʻl xarita”lari va dasturlarni tasdiqlaydi;
Kengash majlislari Kengash raisi yoki uning topshirigʻiga muvofiq rais oʻrinbosari boshchiligida oʻtkaziladi;
Kengash majlislarida qabul qilingan qarorlar barcha davlat organlari va tashkilotlari tomonidan bajarilishi majburiy boʻlgan bayonnomalar bilan rasmiylashtiriladi.
4. 2022 yil 1 oktyabrdan boshlab soha va tarmoqlarda islohotlarni amalga oshirish, ularni muvofiqlashtirish hamda natijadorligini baholash tartibi joriy etilsin va unga koʻra Agentlik:
a) alohida soha va tarmoqlarni isloh qilish va muvofiqlashtirish boʻyicha:
har yili 1 oktyabrga qadar keyingi yil uchun isloh qilinadigan tegishli soha va tarmoqlar boʻyicha ish rejani tasdiqlash uchun Kengashga kiritadi;
mahalliy va xorijiy ekspertlar, tegishli vazirlik va idoralarning vakillarini (asosiy ish joyidagi ish haqi saqlangan holda) jalb etgan holda Agentlik xodimi rahbarligida loyiha guruhlarini (ofislarini) shakllantiradi;
loyiha guruhlari (ofislari) tomonidan joriy holatning chuqur tahlil qilinishi, baholanishi va takliflar ishlab chiqilishi boʻyicha texnik topshiriqni shakllantiradi va konsalting tashkilotlarini jalb etgan holda tegishli soha va tarmoqlarni isloh qilish boʻyicha “yoʻl xarita”larini ishlab chiqadi;
“yoʻl xarita”laridagi konseptual masalalar boʻyicha qaror qabul qilish uchun Kengash majlisini oʻtkazish tashabbusi bilan chiqadi;
soha va tarmoqlarni isloh qilish boʻyicha “yoʻl xarita”lari, jumladan ularda nazarda tutilgan masalalar yuzasidan normativ-huquqiy hujjatlarni ishlab chiqadi yoki uning ishlab chiqilishi
va kelishilishini muvofiqlashtiradi;
islohotlarga doir qabul qilingan normativ-huquqiy hujjatlarning ijrosini doimiy monitoring qiladi, ularni amalga oshirishga toʻsqinlik qiluvchi omillarni aniqlab, bartaraf etish choralarini koʻradi;
b) tegishli vazirlik va idoralar tomonidan islohotlarning amalga oshirilishini baholash boʻyicha:
har yili 1 noyabrga qadar Agentlikning tegishli soha va tarmoqlarda amalga oshirilayotgan islohotlarni baholash boʻyicha ish rejasini tasdiqlash uchun Kengashga kiritadi;
mustaqil ekspert va mutaxassislarni jalb etgan holda har bir soha va tarmoq boʻyicha ekspertlar guruhlarini tashkil etadi;
har chorakda amalga oshirilayotgan islohotlar samaradorligini baholab boradi va erishilgan natijalar, kamchilik, muammolar hamda ularni bartaraf etish boʻyicha takliflarni koʻrsatgan holda baholash yakunlari toʻgʻrisida Kengashga axborot kiritadi;
islohotlarni amalga oshirish holati boʻyicha vazirlik va idoralar rahbarlarining hisobotini Kengashda koʻrib chiqish uchun uning majlisini oʻtkazish tashabbusi bilan chiqadi.
5. Belgilansinki:
soha va tarmoqlarni isloh qilish boʻyicha “yoʻl xarita”larini ishlab chiqish, amalga oshirish hamda ushbu jarayonlarni baholash uchun konsultantlar Agentlik tomonidan yoki u bilan kelishilgan holda jalb etiladi;
masʼul vazirlik va idoralar loyiha guruhlari (ofislari) va konsalting tashkilotlari faoliyat koʻrsatishi uchun begʻaraz ravishda yetarli sharoitlarni (bino, xona, texnika vositalari va boshqalar) yaratadi;
soha va tarmoqlarni isloh qilish boʻyicha “yoʻl xarita”larini amalga oshirish bevosita masʼul vazirlik va idora tomonidan amalga oshiriladi va ularning birinchi rahbarlari mazkur masalalar yuzasidan javobgar hisoblanadi;
masʼul vazirlik va idoralar soha va tarmoqlarni isloh qilish hamda davlat ishtirokidagi korxonalarni transformatsiya qilish boʻyicha amalga oshirilgan ishlar toʻgʻrisida keyinchalik Kengashga kiritish uchun Agentlikka har oyda maʼlumot taqdim etadi;
Adliya vazirligi har chorakda Yangi Oʻzbekistonning taraqqiyot strategiyasi va davlat dasturlarining ijrosi boʻyicha umumlashtirilgan tahliliy maʼlumotni Agentlikka kiritib boradi.
6. 2022 yil 1 oktyabrdan boshlab quyidagi tartib joriy etilsin:
a) soha va tarmoqlarni isloh qilish jarayonlariga xalqaro moliya institutlari, chet el tashkilotlari va xorijiy mutaxassislarni hamda begʻaraz koʻmak mablagʻlarini jalb qilish Agentlik bilan kelishilgan holda amalga oshiriladi;
b) xalqaro moliya institutlari va xalqaro tashkilotlar missiyalari tomonidan islohotlar dasturlari, jumladan mamlakatni kompleks baholash Agentlik bilan hamkorlikda oʻtkaziladi;
v) har bir vazirlik va idora xalqaro tashkilotlar, moliya institutlari va ekspertlarning rasmiy xulosa va hisobotlarini ular taqdim etilgan kundan keyin bir hafta muddatda Agentlikka taqdim etadi. Bunda, mazkur Farmon qabul qilingunga qadar tayyorlangan hisobot va xulosalar 2022 yil 1 noyabrga qadar Agentlikka taqdim etiladi;
g) har chorak yakuniga koʻra Kengash majlisi oʻtkaziladi va unda quyidagi masalalar muhokama qilinadi:
mamlakatni strategik rivojlantirishning joriy va istiqboldagi rejalari va ularni amalga oshirish boʻyicha takliflar;
islohotlarni samaralari amalga oshirishga toʻsqinlik qiluvchi holatlar va ularni bartaraf etish boʻyicha aniq manzilli chora-tadbirlar;
hududlarda ochiq muloqotlar doirasida aholining bildirgan fikr va mulohazalari asosida hududdagi siyosiy, ijtimoiy va iqtisodiy holat, fuqarolarni qiynayotgan muammolarni hal etish boʻyicha choralar.
7. Belgilansinki:
mamlakatni ijtimoiy-iqtisodiy rivojlantirish hamda tegishli sohalarda kompleks islohotlarni chuqurlashtirish va liberallashtirish borasidagi strategik masalalar yuzasidan ishlab chiqilgan normativ-huquqiy hujjatlar loyihalarining maqsadga muvofiqligi Kengash majlislarida koʻrib chiqiladi;
Kengash tomonidan maqsadga muvofiq deb topilgan normativ-huquqiy hujjatlar loyihalari Oʻzbekiston Respublikasi Prezidentiga koʻrib chiqish uchun kiritiladi, bunda mazkur normativ-huquqiy hujjatlar loyihalarini boshqa idoralar bilan kelishish talab etilmaydi.
8. Oʻzbekiston Respublikasi Prezidenti huzuridagi Strategik islohotlar agentligining tuzilmasi 2-ilovaga muvofiq tasdiqlansin.
9. Belgilab qoʻyilsinki:
Agentlik bosh direktori va uning oʻrinbosarlari Oʻzbekiston Respublikasi Prezidenti tomonidan lavozimiga tayinlanadi va lavozimidan ozod etiladi;
Agentlik bosh direktori maqomi, mehnatga haq toʻlash, tibbiy va transport xizmati koʻrsatish shart-sharoitlariga koʻra Oʻzbekiston Respublikasi Prezidentining maslahatchisiga tenglashtiriladi,
bosh direktorning birinchi oʻrinbosari va oʻrinbosarlari esa tegishlicha Oʻzbekiston Respublikasi Prezidenti maslahatchisining birinchi oʻrinbosari va oʻrinbosarlariga tenglashtiriladi;
Agentlik xodimlari Agentlik bosh direktori tomonidan Oʻzbekiston Respublikasi Prezidenti Administratsiyasi rahbari bilan kelishilgan holda lavozimiga tayinlanadi va lavozimidan ozod etiladi;
Agentlik xodimlariga Oʻzbekiston Respublikasi Prezidenti Administratsiyasining Ijro etuvchi apparati xodimlari uchun belgilangan mehnatga haq toʻlash razryadlari va ish haqi miqdorlari tatbiq etiladi.
10. Oʻzbekiston Respublikasi Strategik rivojlanish agentligini qoʻllab-quvvatlash jamgʻarmasi Agentlikka oʻtkazilsin va Oʻzbekiston Respublikasi Prezidenti huzuridagi Strategik islohotlar agentligini qoʻllab-quvvatlash jamgʻarmasi (keyingi oʻrinlarda – Jamgʻarma) etib qayta nomlansin.
Belgilansinki:
Jamgʻarma mablagʻlari Oʻzbekiston Respublikasi Prezidenti Administratsiyasi bilan kelishilgan holda tasarruf etiladi;
Jamgʻarma mablagʻlarini shakllantirish va ulardan foydalanish tartibi Oʻzbekiston Respublikasi Prezidenti Administratsiyasi rahbari tomonidan belgilanadi.
11. Belgilab qoʻyilsinki Davlat byudjeti mablagʻlari, Jamgʻarma mablagʻlari, Agentlikning byudjetdan tashqari mablagʻlari, vaqtincha boʻsh mablagʻlarni tijorat banklari depozitlariga joylashtirishdan olingan daromadlar, shuningdek, qonunchilikda taqiqlanmagan boshqa manbalar Agentlik faoliyatini moliyalashtirish manbalari hisoblanadi.
12. Belgilansinki, Agentlik oʻz vazifalarini amalga oshirishda quyidagi huquqlardan foydalanadi:
islohotlar yoʻnalishlari boʻyicha loyiha guruhlarini (ofislarini) tashkil etish, konsalting tashkilotlarini jalb etish hamda malakali xorijiy mutaxassislarni ishga qabul qilish va ularga ish haqini milliy yoki chet el valyutasida toʻlash;
davlat organlari va tashkilotlari, xoʻjalik birlashmalari mutaxassislari, fuqarolik jamiyati institutlari vakillari, ilmiy-tadqiqot institutlari xodimlari, shuningdek, mahalliy va xorijiy olimlar hamda mutaxassislarni shartnoma asosida tadqiqot va tahlil olib borish ishlariga jalb qilish;
xalqaro moliya institutlari, xalqaro tashkilotlar va ekspertlar bilan hamkorlik boʻyicha va boshqa shartnomalarni tuzish;
davlat organlari va tashkilotlaridan zarur statistik, tahliliy hamda boshqa maʼlumotlarni soʻrash va olish;
davlat organlari va tashkilotlarining elektron axborot tizimlaridan bepul foydalanish hamda ushbu tizimlarni Agentlikning elektron tizimlariga integratsiya qilish.
13. Vazirlar Mahkamasi Toshkent shahar hokimligi bilan birgalikda bir oy muddatda Agentlikni joylashtirish choralarini koʻrsin.
14. Agentlik:
bir oy muddatda Agentlik toʻgʻrisidagi nizomni, xarajatlar smetasini, Agentlik xodimlarining mehnatga haq toʻlash shartlarini, shuningdek, Agentlik hamda u tomonidan tashkil etiladigan loyiha ofislari faoliyatini moliyalashtirish manbalarini Oʻzbekiston Respublikasi Prezidenti Administratsiyasi rahbariga tasdiqlash uchun kiritsin;
ikki oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida takliflarni kiritsin.
15. Oʻzbekiston Respublikasi Prezidentining 2018 yil 16 oktyabrdagi “Oʻzbekiston Respublikasi Prezidenti Administratsiyasining rahbar xodimlari, mutaxassislari va xizmatchilarini moddiy ragʻbatlantirish va mehnatiga haq toʻlash tizimini takomillashtirish chora-tadbirlari toʻgʻrisida”gi PQ–3976-son qaroriga 3-ilovaga muvofiq oʻzgartirish
va qoʻshimcha kiritilsin.
16. Mazkur Farmonning ijrosini nazorat qilish Oʻzbekiston Respublikasi Prezidenti Administratsiyasi rahbari S.U. Umurzakov zimmasiga yuklansin.
Oʻzbekiston Respublikasi Prezidenti Sh. Mirziyoyev
