2 fevral kuni Oʻzbekiston yosh fermerlari kengashi va Turkiya Hamkorlik va Muvofiqlashtirish Agentligi (TIKA) ning hamkorlik uchrashuvi boʻlib oʻtdi.
Unda Oʻzbekistonda faoliyat yuritayotgan yosh fermerlar faoliyatiga yordam koʻrsatish boʻyicha bir qancha ijobiy kelishuvlarga erishildi.
Jumladan, endi Turkiya energiya manbalari yordamida sugʻorish tizimlarini rivojlantirish dasturi yosh fermerlar faoliyatida joriy etiladi. Ushbu innovatsion loyiha quyosh energiyasidan foydalanib, yerning tabiiy landshaft joylashuvi tufayli suv chiqishi qiyin boʻlgan maydonlarni sugʻorish imkoniyatini beradi. Unga koʻra Oʻzbekiston yosh fermerlari kengashi tomonidan sugʻorish ishlarida jiddiy muammolarga duch kelayotgan yosh fermerlar faoliyati oʻrganib chiqilgan holda hamkorlarga tavsiya etiladi.
Uchrashuvda shuningdek, asalarichilikni rivojlantirish boʻyicha ham bir qancha loyihalar ilgari surildi. Loyihalarga koʻra ikki tomonning kelishuvi asosida yosh fermerlarga Turkiyadan ona asalarilar hamda asalari koʻpaytirishda kerak boʻladigan tehnologiyalar yetkazib beriladi.
Ushbu loyihalarni amalga oshirish uchun respublikamizning faol yosh fermerlari Turkiyada malaka oshirib qaytishlari ham rejalashtirilgan.
Ilyos Safarov, Oʻzbekiston yosh fermerlari kengashi matbuot xizmati rahbari
