Bugun velosport boʻyicha Oʻzbekiston Mustaqilligining 29 yilligiga bagʻishlangan musobaqa start oldi. Shosseda oʻtkazilayotgan mazkur turnirning birinchi kunida sportchilar 20 km masofani alohida start oladigan yakkalik poyga yoʻnalishida oʻtkazishdi.
Deyarli yarim yil uy sharoitida mashgʻulot oʻtkazgan sportchilar uchun mazkur poyga chinakam bayramga aylanib ketdi. Unda oʻsmirlar, yoshlar va kattalar terma jamoasining aʼzolari oʻz omadini sinab koʻrdi. Erkaklar oʻrtasidagi bahsda Tokio-2020 litsenziyasi sohibi Murodjon Xolmurodov gʻalabani qoʻlga kiritdi. Ayollar oʻrtasidagi bahsda esa Yanina Kuskova eng yaxshi natijani qayd etdi.
Yosh yigitlar (2002-2003) oʻrtasidagi bellashuvda Begzod Rahimboyev birinchilikni egalladi. Qizlar musobaqasida Asal Rizayeva peshqadam boʻldi.
Oʻsmir yigitlar oʻrtasidagi poygada Marsel Veseliy, oʻsmir qizlar oʻrtasidagi musobaqada Anna Kuskova gʻolib boʻlishdi.
J. Saʼdullayev tayyorladi.
