Prezident Shavkat Mirziyoyev 13 avgust kuni «Yangi Oʻzbekiston» bogʻida olib borilayotgan bunyodkorlik ishlarini koʻzdan kechirdi.
Bogʻda manzarali daraxtlar va gullar ekilib, soʻlim hududlar barpo etilmoqda. Bayram tadbirlari oʻtkazish uchun 5 ming oʻrinli ochiq amfiteatr qurilmoqda.
Davlatimiz rahbariga ushbu amfiteatrda boʻlajak qulayliklar haqida maʼlumot berildi.
«Istiqlol» majmuasining asosi tiklanib, qurish va pardozlash ishlari davom ettirilmoqda. Unda Oʻzbekistonning 3 ming yillik tarixi, ajdodlarimizning buyuk merosi, xalqimizning milliy qadriyatlari oʻz ifodasini topadi.
Prezidentimiz ushbu majmuadan oʻrin oladigan barelyef va bezak namunalari bilan tanishdi. Mutasaddi va quruvchilarga oʻz tavsiyalarini berdi.
