Har kuni anhor boʻyiga chiqaman. Karantin boshlangan dastlabki kunlarda chiqmadim, xalos. Chunki bu oʻttiz yillik shaxsiy qadriyatim, sogʻlom turmush tarzini xush koʻrgan tabiatimga xos xususiyatim! Koʻpincha nevaralarimni ham yonimga olaman. Doimo niqob taqib olamiz, qoʻlimizda rezina qoʻlqop ham boʻladi.
Anhor boʻyi avvallardanda gavjum. Sportning turfa sohalarining vakillari maxsus mashqlari bilan shugʻullanishadi. Keksalar xushmanzara joylarda piyoda yurish zavqini surishadi. Bizga oʻxshab oilaviy chiquvchilar ham talaygina. “Tanish-bilishlar chiqsa, ikki metr nari turib soʻrash menga oʻxshab”, deya oʻrgataman nevaralarimga. Mabodo salomlashish uchun qoʻl choʻzsa, “uzr» deya qoʻlingni koʻksingga qoʻyib “assalomu alaykum” degin yana bir bora oʻrgataman. “Agar roʻparamizdan odam kelayotgan boʻlsa men ikki metr nariga qochishga harakat qilaman. Sizlar ham meni harakatimni takrorlang. Odam odamdan qochadigan bu sinovli damlar ham oʻtib ketadi”, deya taʼkidlayman yana. Sakkiz va olti yoshli nevaralarim oʻgitlarimni oladi. Qoʻl choʻzgan odamlar ham ularning nazokatli harakatlaridan beixtiyor kulib yuborishadi. Bolalarga tushintirish oson, afsus kattalarga tushintirish juda qiyin.
Karantin davri boʻlishiga qaramay, anhor boʻyida yurganlarning deyarli yarmi niqobini engagiga taqib oladi. Ayniqsa yoshlar!. Kuchiga, sogʻlomligiga ishonadi ular. Yuragida oʻti bor. Albatta, yuragida “gʻurji” yaʼni shijoati boʻlishi yaxshi, biroq tartib-intizomga rioya qilmasligi yomon. Yana ularning guruh boʻlib yurishini aytmaysizmi? Gohida, tartibga chaqiraman. Baʼzilari hozirjavoblik bilan:”biz bitta oilamiz” deya javob qaytarishadi. Ularning sinfdosh, kursdosh, mahalladoshligi mana men deb koʻrinib tursa-da, nimadir deyishni xush koʻrishadimi, bilmadim?
Bir amallab odam yoʻq joyga, xushmanzara daraxtlar orasiga oʻtib olamiz. Tepamiz toʻrt-besh metr balandlik, pastimizda esa 7-8 metr qiyolik. Balandlikdan pastga tushadigan zinopoya yoʻlak ham bizdan 4-5 metr uzoqlikda joylashgan. Ana shu joyda niqobni tushirib qoʻyib mashqni boshlaymiz. Uyga qaytayotib yana odamlardan qochish boshlanadi. Ollohim osayishta kunlaringni qadriga yetmadikmi, oʻzing kechir biz gʻaflatdagi bandalarni deya beixtiyor shivirlayman.
Bu soʻzlarni nega yozyapman? Chunki, AOKA oʻz telegramm sahifasida yoritgan infografikani koʻrib, xursand boʻldim, minnatdorligimni ham bildirib qoʻygim keldi.
AOKA krantin kunlar uchun mutaxassislar bilan dolzarb mavzularda huquqiy, tibbiy, ijtimoiy savol- javoblar uyushtirayapti. Ushbu sahifani oʻqigan kishining dili yorishadi. Oʻzingizga kerak nimanidir olasiz. Foydali maslahatlarni saytga qoʻyaman. Ularni ezgulik, savob niyatida telegramm orqali yaqinlarimga, doʻsti- yoronlarimga, tanishlarimga joʻnataman. Baʼzilar hatto ochib qarashmaydi ham. Shu darajada mutolaaga befarq. Ijtimoiy tarmoqlardagi mayda gaplarni esa oʻqib, munosabat ham bildirishadi. Hatto ayolu erkaklarning reklamabop tushgan suratlarini sharhlashadi. Shunga vaqt sarflashadi. Undan koʻra salomatligi, bilimi, ong-shuurining yuksalishiga koʻmakchi boʻlgan sahifalarni ochmaydimi, deya hayron boʻlaman.
AOKAning navbatdagi brifingda niqob taqish madaniyatini ifodalaydigan infografika joylashtirgani ayni muddao boʻldi. Bu juda zarur edi. Chunki, keyingi paytda aholi orasidan kasallik yuqtirganlar koʻpmoqda. Hatto, mutaxassislarning taʼkidlashicha, qayerda, qanday yuqtirganini, kimdan yuqtirganini bilmaydiganlar ham bor. Infografikada niqob taqishning mohiyati, ahamiyati va samarasi aniq koʻrinib turibdi.
Aziz yurtdoshlarim, karantin talablariga rioya qilishingizni soʻrayman. Bu oʻzingizning himoyangiz uchun, oilangizning salomatligi uchun zarurligini anglaysiz, degan umiddaman.
Iltimos, niqob taqish tartibiga masʼuliyatli boʻling! Kasal boʻlmang! Bu masʼullik orqali yurtimizdan pandemiya balosining chekinishiga, yurtimiz tinchligi, xalqimizning omonligi, xonadonlarimizning osoyishtaligiga munosib hissa qoʻshgan boʻlasiz.
Butun olamni oʻrgimchak toʻridek qamrab olgan koronavirus balosining chekinishida butun dunyo ahliga, jumladan elimizning har bir oilasiga tilakdoshman!
Raʼno ZARIPOVA, Oʻzbekiston Respublikasida xizmat koʻrsatgan jurnalist
Ushbu maqola Oʻzbekiston Respublikasi Oliy Majlisi huzuridagi nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash Jamoat fondi loyihasi asosida uyushtirildi.
