Bugungi tavsiyalarimiz qonni tozalovchi, tomirlarni ochuvchi va qon tomirlaridagi xolesterinning miqdorini pasaytiruvchi malhamlar haqidadir. Ushbu usullar tabiiy mahsulotlardan boʻlib, azal-azaldan sharq tibbiyotida qoʻllanib kelingan.
Malhamni tayyorlash usuli: Buning uchun 5 dona limon suvi siqib olinib, shisha bankaga solinadi va unga 5 bosh taxta xovonchada yoki mikserda yanchilgan sarimsoqpiyoz va yarim kg toza asal qoʻshiladi. Idishning ogʻzi 6 qatlam doka bilan yopiladi va qorongʻi joyda 7 kun saqlanadi. Soʻngra shisha bankaning usti yopib qoʻyilib, tayyor malhamdan kuniga bir mahal 4 choy qoshiqdan isteʼmol qilinadi. Har safar ogʻizga 1 choy qoshiq olinadi va uni darhol yutmasdan, dorining ogʻizda tarqalishini taʼminlagan xolda chaynab-chayqab eritish lozim. Dorining bunday tarzda isteʼmol qilinishi muhimdir, chunki dori oshqozonda emas, balki ogʻizda kapillyar tomirlarga singdirilishi zarur. Tayyorlangan malham tugagunga qadar har kuni aniq bir soatda och qoringa ichiladi. Malhamning shunday tarzda qabul qilinishi qonni tozalaydi, yurak va miya tomirlarini tozalab, ochadi.
Agar malham birdan ichilsa, jigar xastaliklarini, oshqozon va oʻn ikki barmoqli ichak yarasini tuzatishga yordam beradi hamda oshqozon infeksiyalarini tugatadi. Dori salqin va qorongʻi joyda uzoq muddat saqlanilishi mumkin va uni sogʻlom insonlar, ayniqsa yoshi ulugʻlar uchun profilaktika maqsadida, kasallar uchun esa shifo topish maqsadida yiliga bir martadan qabul qilish tavsiya etiladi.
Piyozli malham tayyorlash. Buning uchun yangi va durkun piyozdan bir stakan sharbat olinadi va unga bir stakan toza asal aralashtiriladi. Bu aralashmadan kuniga 1 mahaldan och qoringa 30 grammdan oʻzini yoki sarimsoqli zaytun yogʻi bilan birgalikda ichiladi.
Sarimsoqli zaytun yogʻli malham tayyorlash: Buning uchun bir stakan zaytun yogʻiga bir bosh yanchilgan sarimsoqpiyoz yaxshilab aralashtiriladi. Va malham bir kun muzlatgichga qoʻyiladi. Soʻngra aralashma dokadan oʻtkaziladi. Ushbu malham yuqoridagi piyozli malham bilan yoki kuniga 1 martadan 30 gramm limon sharbati bilan aralashtirilib, ichiladi.
Ushbu neʼmatlar yurak qon-tomiri xastaliklaridan asrash, qon bosimini va xolesterin darajasini pasaytirishdan tashqari, shamollagan bemorlar uchun ham juda foydalidir. Shuningdek, turli viruslardan ham asraydi.
Aziz mushtariylar, salomatligingiz oʻz qoʻlingizda, kasallikni oldini olishga oʻrganing. Avvalo, vujudingizga quloq tutishni ham kanda qilmang. Farzandlaringizni ham bolalikdan sogʻlom turmush tarziga rioya qilib yashashga, tibbiy bilimini muntazam yuksaltirib borishga odatlantiring. S0gʻlom turmush tarziga, aziz ota-onalar, avvalo oʻzingiz rioya qiling, soʻngra farzandingiz sizdan koʻrib odatlanadi!
R. Zaripova tayyorladi.
