S vitamini organizmning infeksiyalarga chidamliligini oshiradi va u mavjud neʼmatlar

0
4617
marta koʻrilgan.

Ayni kunda doʻkonlarda sitrus mevalarning ayniqsa, limonning narxi oshib ketdi. Tarkibida  S vitamini bor mahsulotlar koronavirusning oldini olishi eʼlon qilinishi tufaylimikan? Yoki boshqa sabab bormi buni Olloh biladi.

 Darhaqiqat, S vitamini taqchilligi immunitetni pasaytirishi mumkin. Shu sababli shamollamaslik uchun uning miqdorini meʼyorida ushlab turish lozim. Koronavirus ham shamollashning bir turidir.

S vitamini uglevod, oqsil va minerallar almashinuvida, organizmdagi oksidlanish-qaytarilish jarayonlarida va qon hosil boʻlishida ishtirok etadi. S vitamini organizmning infeksiyalarga chidamliligini oshiradi va toʻqimalar hamda hujayralarning oʻsishiga yordam beradi. Shuningdek, mayda qon tomir (kapillyar)larning devorini mustahkamlaydi. Bu vitamin meva-sabzavotlar tarkibida koʻp boʻladi. S vitamini yorugʻlik va qaynash jarayonida tez parchalanib ketgani bois mahsulotlarni toʻgʻri saqlash va pishirish muhim ahamiyatga ega.

Aksariyat odamlar sitrus mevalarni  S vitaminiga  boy mahsulotlar deb bilishadi. Aslida bunday emas. S vitamini bulgʻor qalampiri, achchiq koʻk qalampir va tuzlangan karamda ancha koʻproqdir. Ularda apelsindan koʻra 10 marta koʻproq S vitamini bor, deb yozishadi parhezshunos olimlar.

Shuningdek, sitrus mevalardan tashqari naʼmatakda, chakanda moyi (oblepixa)da, rangli karamda, yashil noʻxotda, loviyada, trupda, kivi va qizil rangli mahsulotlarda ham S vitamini mavjud.

Sarimsoq eng koʻp tarqalgan dorivor oʻsimlik. Bundan tashqari sarimsoq kaliy, magniy, fosfor, kalsiy, yod minerallariga va sink, marganets, selen mikroelementlariga boy. Kuniga 2 boʻlakcha sarimsoq shamollashni unutish uchun kifoya.

Bu noz-neʼmatlar pishirish jarayonida foydali xususiyatlarini yoʻqotadi. Shuning uchun iloji boricha xom holatida isteʼmol qilish foydalidir.

Immunitetni qoʻllab-quvvatlash uchun yongʻoq, javdar unidan tayyorlangan non, tuxumning sarigʻini isteʼmol qilish ham koni foyda. Ular Ye vitaminiga boy boʻladi.  Rux moddasi saqlovchi mahsulotlar ham shamollashimizga yoʻl qoʻymaydi.

Ertalab 30 gramm yongʻoq – bu yetarli miqdordir. Bu miqdorda mikroelementlar va foydali yogʻlar yetarli boʻladi va xavfsiz kaloriya hisoblanadi.

Yogʻli ovqatlar, konservalangan, marinadlangan mahsulotlar, qahva, spirtli ichimliklardan esa voz kechishga toʻgʻri keladi. Organizm yuqori kaloriyali ovqatni hazm qilishda koʻproq energiya sarflaydi, spirtli ichimliklar esa foydali komponentlarning oʻzlashtirilishini sekinlashtiradi. 

Tibbiyot fanlari nomzodi Shoira BEKCHANOVA tayyorladi

Ushbu maqola Oʻzbekiston Respublikasi Oliy Majlisi huzuridagi nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash Jamoat fondi  loyihasi asosida uyushtirildi.

Yoyish

MULOHAZA BILDIRISH

Mulohaza kiritilmadi!
Ismi sharifingizni kiriting.