Rossiya Federatsiyasi Moskva shahrida boʻlib oʻtadigan “Intermuzey-2019” xalkaro festivalida ilk bor “Ichan kalʼa” muzey-qoʻriqxonasi oʻzining Smart-muzeyi bilan ishtirok etadi. Mazkur festival 2019 yil 30 may — 2 iyun kunlari Moskva shahrining «Manej» Markaziy koʻrgazmalar zalida oʻtkaziladi.
Maʼlumot oʻrnida aytib oʻtish joiz, mazkur festival muzey sohasida yilning asosiy tadbirlaridan biridir. “Intermuzey” xalkaro festivali ekspozitsiya qismidan, biznes va madaniy dasturlar, shuningdek, ishtirokchi muzeylar oʻrtasida koʻrik-tanlovlardan iborat. Festival har yili Rossiya va yaqin hamda uzoq xorij mamlakatlardan 400 dan ziyod muzeylarni, shuningdek, 3000 dan ortiq professional muzey xodimlarini birlashtiradi.
Yurtimizga tashrif buyurayotgan sayyohlar oqimini oshirish, chet ellik individual sayyohlarga qulaylik yaratish, sayyohat taʼsurotlarini eslab qolish va turistik manzillariga eʼtiborni oshirish maqsadida may oyining boshida “Ichan kalʼa” muzey-qoʻriqxonasida joriy etilgan Nazzar innovatsion dasturi asosidagi Smart-muzeylarining “Intermuzey” xalkaro festivalida taqdimoti boʻlib oʻtadi.
