Shu kunlarda Oʻzbekiston Respublikasi Turizmni rivojlantirish davlat qoʻmitasi, Oʻzbekiston elektron ommaviy axborot vositalari milliy assotsiatsiyasi hamda “BBC” teleradiokompaniyasining Oʻzbek xizmati tomonidan “Bobur va Boburiylar malikalari izidan” deb nomlangan koʻrsatuv tasvirga olinmoqda, deya xabar beradi Turizmni rivojlantirish davlat qoʻmitasi matbuot xizmati.
Ijodiy guruh tasvir ishlarini olib borar ekan, Boburiylar sulolasi tarixi, uning mamlakatimiz sivilizatsiyasida tutgan oʻrni, maʼnaviy-maʼrifiy, madaniy hayotimizdagi ahamiyatini Boburiylar malikalari timsolida yaqqol ifoda etishga harakat qiladi.
Bu safar filmni tayyorlashda yangicha qarashlar, fikrlar bilan yondashilib, samarqandliklar bilan qiziqarli suhbatlar uyushtiriladi. Bu koʻhna zaminga dunyoning turli burchaklaridan tashrif buyurayotgan sayyohlar oʻz taassurotlari bilan oʻrtoqlashadilar.
Mazkur film tez orada “Sevimli” telekanali orqali namoyish etilishi rejalashtirilgan.
