Кўксарой қароргоҳида 14 февраль куни Президент Шавкат Мирзиёевнинг мамлакатимиз ёшлари билан мулоқоти бўлиб ўтди.
Унда ҳудудлардаги студиялардан ҳам кўплаб ўғил-қизлар иштирок этди. Улар орасида талижалик каштачи-ҳунарманд Азиза Тожиева ҳам бор эди. Талижа деган қишлоқ борлигини аввал эшитмаган эканмиз. Cуриштириб билcак, у Шофирконда жойлашган экан. Бухоро шаҳридан эллик километр нари-беридаги бу қишлоқ унча катта эмас. Одамлари меҳнаткаш, уста-ҳунармандлари кўп.
Азиза онаси – уста-ҳунарманд Муҳаббат Қўчқорованинг йўлидан бормоқда. Онанинг дуосини олган, айтганларини тўкис бажарган фарзанд эса ҳеч қачон кам бўлмаган. Бугун каштачиликда анча ном чиқарди. Лоф эмас, бугун шу қишлоқда тикилган ҳунармандчилик маҳсулотларига АҚШ, Испания, Италия ва Буюк Британия каби олис юртлардан буюртмалар олинмоқда.
Бу бежиз эмас, дунёда бора-бора – техника ва технология ривожланган сари қўл меҳнати билан яратилган ижодий ишларга талаб ортаверади. Қалблар қалб қўри бериб яратилган буюмларни илиқ қабул қилади. Шунинг учун уларнинг қиймати тушмайди.
– Президент олис бир қишлоқнинг мендек оддий қизи эришаётган ютуқларга, билдираётган таклифларига бефарқ эмас, – дейди Азиза Тожиева. – Давлатимиз раҳбари бизга қарата сизлар эришаётган натижалардан хурсандман, сизларни ҳамиша қўллаб-қувватлайман дедилар. Бу эътибор нафақат мен, балки мамлакатимиздаги ҳунармандчилик йўналишида фаолият олиб бораётган тенгдошларимга ўзгача мотивация бўлди. Тадбиркорлар, хусусан, ҳунармандлар учун берилаётган имкониятлардан самарали фойдаланяпман. Натижа ёмон эмас. Буюртмаларимиз сони ортди. Ҳудуддаги тенгдошларимиз билан бир жамоага айланганмиз. Сафимиз кенгаймоқда. Оилада учинчи авлод ҳунармандман. Ҳозирги пайтда шунчаки бу ишни мукаммал ўзлаштириш билан мўлжаллаган маррамга ета олмайман. Шунинг учун чет тиллари ва электрон тижорат сирларини ўрганяпман. Ҳозир жаҳон бозорига йўл топдик. Instagram, Etsy ва eBay орқали онлайн савдони йўлга қўйганмиз.
Дарҳақиқат, мамлакат эртаси эгалари камолоти йўлида изчил ислоҳотлар амалга оширилмоқда. Ўша кунги мулоқотда ҳам Президент ёшлар тадбиркорлигида мутлақо янги даврни бошлаб берадиган учта муҳим ҳужжатга имзо чекканини эълон қилган эди.
Бу ҳужжатлар ҳам юртимизда ҳали Азизага ўхшаган яна минглаб ташаббускор ва изланувча ёшларни олдинга бошлайди. Салоҳиятини намоён қалаётган ўғил-қизлар эса юрт тараққиётини кафолатлайдиган асосий кучдир.
Икром АВВАЛБОЕВ, ЎзА
