Sut mahsulotlarining foydasi

0
3193
marta ko‘rilgan.

Buyuk alloma Abu Ali ibn Sino o‘z asarida sut mahsulotlarini iste’mol qilish uzoq yashashning garovi ekanligi haqida aytib o‘tgan. Tuya, echki, biya va sigir sutlari foydasini keng tushuntirgan.  Rus olimi Mechnikov esa buning haqiqat ekanligini o‘tgan asrdayoq isbotlab bergandi. O‘shanda laktobatsillalar bilan ivitilgan sut mahsulotlari «Mechnikov qatig‘i» deb atalgandi. Bizning davrimizda ham yogurt tayyorlash uchun tomizg‘i sifatida bulg‘or tayoqchalari va termofil streptokokklardan foydalaniladi. Sut qatiq zamburug‘i yordamida ivitilganda chuchuk qatiq – kefir hosil bo‘ladi.


Nonushtaga tanovvul qilingan xushta’m tvorog yoki yogurt badanga quvvat bag‘ishlaydi va modda almashinuvini yaxshilaydi. Suzma esa ichaklarga koni foyda. Ovqat hazm qilinishiga yordam beradi. Hatto, uning zardobi ham ichaklarni tozalashda qadimdan ishlatiladi.


Oshqozon va ichaklar tozalanganidan keyin  albatta ko‘pgina kasalliklardan forig‘ bo‘lish mumkin. Xalq tabobatida suzma zardobi organizmni tozalashda keng foydalanilgan.


Ayni vaqtda esa ba’zi sut va qatiq mahsulotlariga probiotik shtammlar qo‘shila boshlandi. Probiotik so‘zi tarjima qilinganda «hayot uchun» degan ma’noni bildiradi. U bilan boyitilgan mahsulotlar ovqat hazm bo‘lishini yaxshilaydi. Ichaklarni toksin (zahar)lardan tozalaydi, ozishga ko‘maklashadi. Ular hayotiy quvvatni oshiradi, qondagi xolesterin va qand moddasini kamaytiradi, buyrakda tosh paydo bo‘lishiga to‘sqinlik qiladi va yurak faoliyatiga ham ijobiy ta’sir etadi. O‘zimiz tayyorlagan suzma va undan tayorlangan qurut suyaklarni tishlarni mustahkamlaydi. Uning tarkibidagi kalsiy koni foyda.

 Shoira Bekchanova,
tibbiyot fanlari nomzodi

 

Yoyish

MULOHAZA BILDIRISH

Mulohaza kiritilmadi!
Ismi sharifingizni kiriting.