Zaynab Dayibekova poytaxtimizda oʻtayotgan qilichbozlik boʻyicha litsenzion musobaqada gʻalaba qozonib, Tokio-2020 Olimpiya oʻyinlariga yoʻllanma oldi. Bu bilan mamlakatimiz qilichbozlarining Tokio-2020 Olimpiyasi uchun qoʻlga kiritgan yoʻllanmalari 3 taga yetdi.
Z. Dayibekovaning yutugʻi va omadi shunda-ki, qilichboz qizlar orasida sablya yoʻnalishida Olimpiya oʻyinlariga yoʻllanma olgan oʻzbekistonlik ilk sportchidir.
Musobaqa qahramoni bellashuvdan soʻng faxr bilan shunday dedi: “2017 yil muhtaram Prezidentimiz bilan uchrashganimizda ularga Tokio-2020 Olimpiya oʻyinlariga yoʻllanma olaman, deb vaʼda bergan edim. Xudoga shukur, bugungi gʻalabam yuzimni yorugʻ qildi, vaʼdamning ustidan chiqdim. Fursatdan foydalanib, menga ishongan, qoʻllab-quvvatlagan onajonim va murabbiylarimga oʻz minnatdorchiligimni bildiraman. Yangi Oʻzbekiston yoshlari qatorida Tokio Olimpiyasida ham yurtimiz bayrogʻini yanada yuqorilarga koʻtarishga vaʼda beraman”.
GUJUM.UZ
